A Deputación de Pontevedra pecha a liña 3 do Plan Concellos 2021 coa creación de 900 empregos
56 concellos da provincia acolléronse á esta liña de financiación da Deputación que supón un investimento de 9,2 millóns de euros
A Deputación de Pontevedra completou a adxudicación da liña 3 do Plan Concellos 2021 que se traduce na creación de case 900 empregos nos municipios da provincia. Cun investimento de 9,2 millóns de euros un total de 56 concellos poderán financiar a contratación de 876 persoas para traballar en postos municipais nun momento de crise no que a xeración de emprego cobra especial relevancia, tal e como sinalou a presidenta provincial, Carmela Silva.
A presidenta da Deputación mostrou a súa satisfacción "porque ademais estes empregos son fundamentais para garantir a prestación de servizos á veciñanza da provincia", dado que gran parte dos contratos que se van crear teñen que ver "co procedemento administrativo, a atención ao sector de turismo, a política social ou o mantemento de beirarrúas, parques e xardíns".
A liña 3 de Emprego completouse ao ser aprobada a última achega para Dozón de 36.000 euros. Con ela, este concello da comarca de Deza levará a cabo a contratación de cinco persoas: un operario ou operaria condutora e catro peóns ou peoas.
