A Deputación de Pontevedra leva a Bueu as xornadas informativas sobre o servizo de teleasistencia domiciliaria
A institución provincial atende este ano, no marco deste servizo, a preto de 600 persoas de 46 concellos da provincia de menos de 20.000 habitantes
Bueu acollerá este próximo martes 27 de novembro unha sesión informativa sobre a teleasistencia domiciliaria, servizo que a Deputación de Pontevedra financia en colaboración con 46 concellos da provincia de menos de 20.000 habitantes cos que ten asinado un convenio de colaboración. Concretamente, a xornada vaise desenvolver, a partir das 18:30 horas, no Centro Social do Mar, e nela prevese que tomen parte 20 persoas.
Estas charlas informativas que promove a institución provincial teñen como finalidade dar a coñecer á veciñanza a importancia deste servizo para previr e atender situacións de risco. Neste ano 25 concellos solicitaron que se leve a cabo este tipo de sesións informativas, que achegan á cidadanía o funcionamento do programa.
O ano pasado, a Deputación organizou 17 destas xornadas informativas, o que permitiu duplicar o número de solicitudes mensuais do servizo de teleasistencia. Do mesmo xeito, tamén permitiron aumentar a visibilidade do servizo, que neste ano atende a preto de 550 persoas de 46 concellos da provincia.
A teleasistencia domiciliaria permite a persoas de avanzada idade ou con algún tipo de diversidade funcional manter a súa independencia e continuar vivindo no seu domicilio con tranquilidade e seguridade, coa consecuente mellora na súa calidade de vida que isto implica. Ante unha situación de emerxencia no fogar, con só pulsar un botón, os e as usuarias reciben asistencia inmediata, 24 horas ao día e 365 días ao ano, mobilizando os recursos necesarios para dar solución ao problema. Isto é posible grazas a un terminal asociado á liña telefónica, que se instala nos domicilios e que permite establecer unha comunicación directa desde calquera punto da casa, similar ao sistema de "mans libres" dos teléfonos móbiles.
Así mesmo, a través do centro de atención deste programa préstanse servizos de apoio inmediato a demandas de angustia, soidade, accidentes domésticos, mobilización de recursos ante situacións de emerxencia sanitaria, persoal ou social, xestiónanse axendas para recordar á persoa usuaria datos importantes sobre toma de medicación ou realización de xestións e tamén se realizan seguimentos permanentes mediante chamadas telefónicas periódicas. O servizo complétase con visitas regulares aos usuarios e usuarias co obxectivo de acompañar a estas persoas e así minimizar o sentimento de soidade e illamento ao que moitas se ven abocadas e xornadas de convivencia.
O obxectivo fundamental do servizo de teleasistencia é permitir a permanencia das persoas usuarias no seu medio de vida habitual e o contacto permanente co seu entorno socio-familiar, evitando o illamento social, a soidade e asegurando a intervención inmediata ante situacións críticas, o que repercute moi positivamente na calidade de vida destas persoas.
