A Deputación de Pontevedra destina á Lama unha nova achega do Plan Concellos de preto de 10.000 euros
Con este novo investimento o Goberno de Carmela Silva financiará a compra de material e maquinaria para a estación de tratamento de auga potable da vila
A Deputación de Pontevedra aprobou, mediante unha Resolución presidencial, unha nova achega no concello da Lama ao abeiro do Plan Concellos 2018. Trátase esta vez dunha axuda de 9.473,98 euros cos que poderán comprar material e maquinaria para a estación de tratamento de auga potable (ETAP) da vila.
Ademais desta cantidade o Goberno provincial ao través do Plan Concellos xa adxudicou anteriormente varias axudas para o municipio. En concreto, 42.134,58 euros para a rehabilitación da pista multideporte de Verducido; 44.143,45 euros para a renovación do pavimento en camiños en Barcia do Seixo, Covelo e o ensanche dun camiño en Verducido; 28.035,75 euros para o depósito de auga de uso doméstico no Pelete; 20.498,86 € para a creación dun parque infantil na Alameda e realización de obras de mellora no acceso; 118.094,93 € para mellorar a rede de distribución de auga de uso doméstico en diferentes zonas do concello; 32.088,49 € para a humanización do entorno no lugar de Rozadas, e 34.307,08 euros para construír un muro de contención e o ensanche dun camiño en Sucastro.
Ademais, a Deputación adxudicou 42.245,76 € no que corresponde á liña 2 e tamén outros 72.193,80 € que foron destinados á financiación da contratación de 13 traballadoras e traballadores que están a desempeñar funcións no concello, dentro da liña 3 do Plan Concellos 2018.
A Deputación destina este ano á Lama, ao través do Plan Concellos, un total de 814.328,90 euros, un 73,38 % máis que en 2017.
