A Deputación de Pontevedra comeza no Concello da Cañiza as obras de acondicionamento da rúa Silleda

A actuación, que consiste no acondicionamento da beirarrúa e a renovación de diferentes servizos, foi adxudicada por 136.080,87 euros

Este martes 27 de agosto comezaron na Cañiza as obras de acondicionamento da rúa Silleda, adxudicadas por 136.080,87 euros. A través desta actuación, que está previsto que estea rematada nun prazo de tres meses, a Deputación de Pontevedra acondicionará a beirarrúa da estrada e renovará diferentes servizos.

Máis polo miúdo, a actuación consiste no acondicionamento da beirarrúa dereita desde o comezo da estrada ata o cruzamento previo ao parque existente nesa mesma marxe e da beirarrúa esquerda desde o comezo da estrada ata o PQ 0+210, con pavimento e bordo de granito. O ancho de beirarrúa será de 2,5 metros.

Ademais tamén levarase a cabo a renovación de servizos como o abastecemento, electricidade, luz, telefonía, saneamento ou pluviais. Tamén reporase a capa de rodaxe no treito entre o PQ 0+000 e 0+210.