A Deputación colabora en 18 mostras, certames e exposicións da camelia en toda a provincia
A deputada Eva Vilaverde sinala a necesidade de dar a coñecer esta planta tanto no ámbito local coma internacional, xa que Pontevedra "é unha importante zona de produción comercial de camelias ornamentais"
A Deputación de Pontevedra colaborará, desde este mes de xaneiro ata abril, en 18 mostras, certames e exposicións sobre a camelia en toda a provincia. A Estación Fitopatolóxica Areeiro (EFA), centro dependente da institución provincial, é a que xestiona o apoio a todos os eventos mediante o asesoramento aos organizadores, a cesión de plantas, así como a participación presencial nas mostras, ás que traslada unha pequena selección das máis de 1.000 variedades de camelias do terreo de Lourizán.
A deputada responsable de Sectores Produtivos Primarios, Eva Vilaverde, responsable da EFA, subliña a necesidade de dar a coñecer a camelia tanto no ámbito local coma internacional, xa que Pontevedra "é unha importante zona de produción comercial de camelias ornamentais". Así mesmo, destaca que se trata dun elemento fundamental e identificativo dos xardíns da provincia e de Galicia "que ten un importante potencial a nivel turístico".
Vilaverde lembra o importante traballo que desenvolve a Estación Fitopatolóxica cara ao sector, xa que vén realizando estudos en relación cos problemas sanitarios da camelia desde hai máis de 25 anos. Así mesmo, destaca o importante "laboratorio de ensaio" que representa contar cos xardíns de Lourizán, onde se cultiva unha das maiores coleccións de camelia de toda Galicia.
Calendario
O calendario de certames e exposicións no que participa e colabora a Deputación de Pontevedra comezará mañá sábado coa I Mostra da Camelia de Tui, que terá lugar nunha sala de exposicións do edificio municipal Área Panorámica do mencionado concello. A mostra está organizada por un grupo de tudenses amantes da camelia e será inaugurada á unha da tarde. Poderase visitar este sábado, de 16:30 a 20:00 horas, e o domingo, de 10:00 a 14:00 horas e de 16:00 a 19:30 horas.
A seguinte mostra será a X A Camelia en Domaio, organizada pola Asociación de Mulleres Poza de Moura, no CEIP Domaio, o 30 e o 31 deste mes. Xa no mes de febreiro realizarase a II Mostra da Camelia de Vilanova no pavillón de Vilanova de Arousa (os días 6 e 7) e a I Mostra de Divulgación da Camelia en Cambados, no Salón de Peña, situado no paseo marítimo, organizada polo Concello (os días 13 e 14). Na mesma fin de semana tamén se desenvolverán o VII Concurso-Exposición da Camelia en Tomiño, organizado pola Asociación de Vigueses Baixo Miño, e a IV Mostra da Camelia en Torneiros, organizada pola asociación de veciños, así como a décima edición de A Camelia na Festa do Lacón con Grelos de Cuntis. Tamén está prevista unha mostra no aeroporto de Vigo (este ano verá a súa segunda edición), así como a VII Exposición da Camelia en Rubiáns, Vilagarcía de Arousa, o 27 e 28 de febreiro.
En marzo están fixados o XVIII Memorial Antonio Odriozola no mosteiro de Lérez, en Pontevedra (os días 5 e 6), organizado pola Asociación Cristo del Consuelo, e a XIV Exposición da Camelia en Salceda de Caselas, no auditorio municipal. Na fin de semana seguinte tócalle a quenda á XII Gala Camelia no Camiño, organizada pola Asociación de Amigos do Camiño Portugués a Santiago, e o XVI Certame da Camelia no Castelo, en Soutomaior. Xa durante os días de semana tócalle a quenda ao CEIP Campolongo de Pontevedra, que se involucra coa camelia nunha mostra que abrirá o día 15 no propio centro.
O 19 e 20 de marzo a Deputación de Pontevedra desenvolverá a súa propia mostra co LII Concurso-Exposición Internacional da Camelia, que esta edición será no Recinto Feiral-Pazo de Congresos de Pontevedra e na que está prevista a participación de decenas de cultivadores.
Finalmente, a temporada pechará coa IV Mostra da Camelia Cultural de Sanxenxo, no Círculo Cultural Deportivo (os días 24 e 25 de marzo), e coa X Exposición de Camelias Bella Otero, no Auditorio Municipal de Valga, e a IV Exposición Día da Camelia do Concello de Ponteareas, na fin de semana do 9 e o 10 de abril.