A Deputación aproba as bases do programa "Depo termal 2018"
O Goberno de Carmela Silva aproba tamén o expediente para contratar a xestión, desenvolvemento e execución do programa de termalismo social durante o vindeiro ano
A Xunta de Goberno da Deputación de Pontevedra aprobou as bases reguladoras e o expediente para a posta en marcha do programa "Depo termal 2018", ao que a institución provincial achega 102.000 euros e do que se beneficiarán un total de 4.434 persoas dos concellos da provincia que se adhiran á iniciativa.
A través deste programa, tal e como manifestou Silva, a Deputación de Pontevedra pretende facilitar o acceso ao turismo de saúde e dinamizar a economía da provincia de Pontevedra, impulsando a creación e mantemento de postos de traballo no sector turístico durante os períodos de menor actividade, contribuíndo así a desestacionalizar a demanda. Ademais, o programa tamén ten por obxectivos mellorar a calidade de vida dos maiores da provincia, fomentando o envellecemento activo, establecendo novas relacións sociais e favorecendo a participación en actividades que melloran o seu estado anímico.
"Depo termal 2018" contará con dúas modalidades: diúrna e con pernoita. A modalidade diúrna inclúe o traslado, con guía acompañante, durante cinco días consecutivos, en quenda de mañá ou de tarde, a balnearios, talasos ou spa´s onde as persoas participantes no programa poderán gozar durante dúas horas, ao menos, das súas instalacións. Esta modalidade oferta 1.248 prazas das cales 248 serán totalmente gratuítas para persoas en situación de risco, exclusión social ou escasos recursos económicos.
Pola súa banda, a modalidade con pernoita, inclúe o traslado e aloxamento durante cinco noites e seis días en réxime de pensión completa, con entradas ás instalacións termais para gozar delas durante un mínimo de dúas horas ao día e con actividades de animación sociocultural. Neste caso, ofértanse 3.186 prazas das cales 186 serán totalmente gratuítas tamén para persoas en situación de risco, exclusión social ou escasos recursos económicos.
Todos os concellos que desexen adherirse ao plan poderán facelo mediante un acordo de adhesión. O prazo para a presentación de solicitudes comezará a partir do día seguinte ao da publicación do extracto da convocatoria no BOPPO e rematará en 20 días naturais. Unha vez publicada na web www.depo.es o listado de concellos adheridos, as persoas interesadas en participar en "Depo termal 2018" terán 30 días naturais de prazo para facelo.
