A Deputación apoia aos sectores máis afectados pola pandemia con novas achegas do Plan Concellos para Marín e Bueu
A institución provincial destina máis de 220.000 euros para axudar á hostalaría, axencias de viaxes ou ximnasios destes dous concellos
A Xunta de Goberno da Deputación de Pontevedra deu luz verde a dúas novas achegas na comarca do Morrazo para axudar aos sectores máis afectados pola pandemia, que suman 223.300 euros e que se enmarcan na liña 2 do Plan Concellos 2021. Os fondos foron aprobados para Marín, a onde chegarán 70.900 euros, e Bueu, que contará con 152.400. As achegas enmárcanse no apoio que a Deputación prestou aos concellos ao longo deste ano, con diversas liñas, para axudar aos concellos a mitigar os efectos da crise socioeconómica causada pola covid-19.
Segundo as bases aprobadas por ámbolos dous concellos, os recursos achegados pola institución provincial están dirixidos a persoas autónomas ou empresas con menos de 10 persoas empregadas de sectores como a hostalaría, as axencias de viaxes ou os ximnasios e poderán optar a subvencións de, como máximo, 1.000 euros.
Pola súa banda, o Concello de Bueu establece especificamente que poderán optar a estas axudas aqueles establecementos que tiveran que pechar polas medidas restritivas derivadas da Covid-19 ou que, sen ter que verse obrigadas a pechar, tiveran unha baixada da súa facturación do 40% con respecto a situación pre-pandémica.
