A Deputación aplaude a iniciativa das persoas emprendedoras que en tempos de COVID-19 impulsan tres novas empresas nos Viveiros de Barro e Lalin
Dous novos proxectos empresariais incorpóranse ao Viveiro de Barro, que ten xa o 100% das naves e o 75% das oficinas ocupadas, e un a Lalín, cun 75% de ocupación
A capacidade e iniciativa emprendedora da veciñanza da provincia de Pontevedra estase a plasmar nos viveiros da Deputación en Barro e Lalín, que pese á crise orixinada pola Covid-19 están a sumar novos espazos ocupados. Así, a institución provincial vén de asinar os convenios para o asentamento de tres novos proxectos empresariais, dous no Viveiro de Barro e un no de Lalín que supoñen que o 100% das naves e 75% das oficinas do primeiro están xa ocupadas e, no caso do segundo, as cifras ascendan tamén ao 75%.
Ao Viveiro de Barro incorpóranse dous proxectos emprendedores como son Tayser Parts S.L., centrada no comercio ao por menor de accesorios e pezas de recambio para produtos terrestres, e Cellgal Telecom SL, que asentará a súa actividade na instalación e mantemento de equipos de cobertura móbil. Pola súa banda, ocupará unha oficina no Viveiro de Lalín unha iniciativa centrada no asesoramento veterinario a explotacións gandeiras.
A través dos viveiros de empresas de Barro e Lalín a Deputación pretende facilitar o desenvolvemento de proxectos empresariais creativos e innovadores, así como de iniciativas económicas de interese para a provincia. Deste xeito, estes espazos acollen temporalmente proxectos que precisan dun espazo para comezar a dar os seus primeiros pasos no mercado. Amais, a Deputación a través dos viveiros presta unha ampla gama de servizos para as persoas emprendedoras como a formación en materia de dinamización empresarial e fomento da cultura emprendedora; en creación e xestión de empresas, internacionalización, xestión da calidade, medio ambiente e prevención de riscos laborais; información sobre subvencións e asesoramento en materia xurídica, fiscal e laboral, así como en materia TIC e de competitividade empresarial a través da rede SmartPeme.
