A Deputación amplía o prazo para que os concellos se adhiran ao Plan Revitaliza de compostaxe ata o 19 de xaneiro

O vicepresidente Mosquera subliña que a prórroga xorde tras o grande interese dos concellos, que están a manter numerosas reunións co persoal técnico provincial

O vicepresidente da Deputación, César Mosquera, anunciou hoxe a ampliación do prazo para que os concellos se adhiran ao Plan Revitaliza e apliquen a compostaxe como sistema global de tratamento de lixo. Segundo asegurou, a prórroga veu dada polo grande interese dos concellos, que están a manter numerosas reunións co persoal técnico provincial. A intención é facilitar a tramitación das solicitudes, tanto para as adhesións coma para as subvencións.

"O noso obxectivo é facilitar o traballo das entidades locais, que están a concretar os detalles dos seus respectivos plans municipais de recollida e tratamento de residuos domiciliarios xunto co asesor provincial Carlos Pérez", explicou Mosquera, quen destacou que, a día de hoxe, hai xa moitas solicitudes presentadas e unha previsión de que cheguen bastantes máis. "Agardamos poder dar saída a todas as peticións que recibimos para implantar a compostaxe con garantías de éxito. Entendemos que moitos concellos están animados a cambiar de sistema de xestión, pero queremos facelo de xeito ordenado e cunhas bases ben asentadas", subliñou o nacionalista.

As bases reguladoras das subvencións convocadas para consolidar o Plan Revitaliza foron publicadas no Boletín Oficial da Provincia de Pontevedra o pasado 19 de outubro de 2016. A adhesión formal ao plan pretende garantir que o concello traballe durante este mandato para cumprir coa obriga legal de tratar, polo menos, o 35 % da fracción orgánica do lixo mediante compostaxe en 2020. Unha vez formalizada a adhesión, cada municipio poderá beneficiarse de tres liñas de colaboración: formación de persoal, elaboración dun plan de residuos e subvención de compra de composteiros.

A primeira liña, de formación de persoal, pretende proporcionarlle coñecementos básicos ao persoal traballador das contratas municipais, ou incluso a veciñas e veciños voluntarios interesados, coa finalidade de que realicen traballos ordinarios nos centros de compostaxe comunitaria (CCC) que serán tutelados polas mestras e mestres composteiros da Deputación.

A segunda liña de subvencións permítelles aos concellos adheridos dispoñer dun plan de residuos individualizado para cada concello no que se estude que parte da poboación pode compostar de xeito individual, canta pola vía dos centros de compostaxe comunitaria e canta a través dunha planta de tratamento. Tamén se terán en conta cuestións coma o tipo de recollida ou a existencia de produtores singulares.

Finalmente, a terceira liña de axudas é puramente económica e terá continuidade con outras novas ampliacións ata final do mandato. Neste exercicio habilitouse unha partida de 1.250.000 euros que permitirá subvencionar a compra de composteiros individuais e comunitarios aos concellos e que dará cobertura a entre 80.000 e 100.000 habitantes.

Criterios para as subvencións

Con respecto aos criterios para optar ás subvencións, o vicepresidente salientou que a selección realizarase en función da simplicidade de aplicación da compostaxe en cada concello, primando os concellos de menor tamaño que poidan solucionar a súa xestión a través de composteiros individuais e comunitarios.

Mosquera lembrou que os primeiros concellos que se adhiran sairán economicamente beneficiados, porque os 1,25 millóns de euros iniciais repartiranse entre os solicitantes e, de non cubrir o número previsto, a porcentaxe de subvención poderá subir do 50 % ao 90 %.

En canto ao aforro para as arcas municipais que suporá a aplicación da compostaxe como modelo de xestión, o vicepresidente asegurou que o investimento necesario estará amortizado polos concellos no prazo dun só ano. Segundo os cálculos realizados polo persoal técnico, cada centro de compostaxe comunitario instalado consegue tratar un mínimo de 16 toneladas de orgánicos ao ano. Tendo en conta que o custo medio de tratamento e transporte por tonelada de lixo na provincia está en 191 euros -dos que 76 euros corresponden ao pago a Sogama-, o aforro está asegurado e permitiría aos concellos paliar o grave déficit que a xestión do lixo representa a día de hoxe.

A ampliación do prazo para adherirse ao Plan Revitaliza e optar ás subvencións foi aprobada hoxe na Xunta de Goberno.