A Deputación achega máis de 80.000 € ao concello de Forcarei para a pavimentación da vía municipal do cemiterio de Meavía
A institución provincial leva investidos 358.677,47 € no marco do Plan Concellos 2016, o que supón o 71,3% do total destinado ao municipio
A Deputación de Pontevedra, na Xunta de Goberno, vén de aprobar unha achega económica de 80.341,44 € para o concello de Forcarei, que se destinará para a pavimentación da vía municipal do cemiterio de Meavía-Estrada EP 7201. Trátase dunha axuda enmarcada na liña 1 de investimentos do Plan Concellos 2016.
Dentro desta mesma liña de investimentos, a institución provincial xa ten achegados outros 73.999,17 € para as obras de substitución de fiestras na Casa do Concello. Así mesmo, na súa liña 3 -actividades culturais, deportivas, sociais, turísticas e medioambientais- a Deputación xa ten destinado este ano a Forcarei un total de 18.852,58 € para a Cabalgata de Reis, a IV Carreira Popular Concello de Forcarei e os cursos de pilates.
Ao abeiro da liña 4 tamén se aprobou outra partida de 110.074,03 € para a contratación de 11 traballadores e traballadoras para realizar diversas tarefas municipais, así como outros 75.410,25 € para a liña 2 destinada a gastos correntes, amortizacións e pagamento de débedas.
No que vai de ano, a Deputación de Pontevedra leva aprobado o 71,3% do total destinado a Forcarei para o Plan Concellos 2016, o que supón un investimento no municipio ata o momento de 358.677,47 €.
