A Deputación e Xoga poñen en marcha unha investigación para recoñecer oficialmente a Lingua de Signos Galega

A deputada de Lingua, María Ortega, considera "urxente e necesario" recoñecer os dereitos lingüísticos da comunidade xorda e anunciou un investimento de 30.000 euros para comezar o traballo

A Deputación de Pontevedra deu hoxe a coñecer o acordo de colaboración coa Organización de Diversidade Sensorial de Galiza ‘Xoga' polo que se realizará un traballo de investigación para recoñecer a Lingua de Signos Galega (LSG) como forma de comunicación oficial. Así o deron a coñecer hoxe a deputada de Lingua, María Ortega, e a presidenta de Xoga, María Jesús Monterde.

A deputada de Lingua desmontou o mito de que a lingua de signos é única e universal –dunha maneira similar ao esperanto–, e destacou que acontece o mesmo que coas linguas orais: existen tantas linguas de signos como comunidades ou nacionalidades. Lembrou que no territorio estatal no ano 2007 recoñecéronse como linguas de signos oficiais a española e a catalán, algo que non aconteceu coa galega por cuestións sociais e políticas, o que fixo que a comunidade xorda galega optara por uniformar a súa vía de comunicación adoptando a Lingua de Signos Española.

Fronte a esta situación, María Ortega defendeu que a comunidade con diversidade sensorial de Galiza ten dereitos lingüísticos "como temos o resto das persoas que vivimos no país", polo que desde o Departamento de Lingua da Deputación se considerou "urxente e necesario" actuar e recoñecer eses dereitos.

Nese punto, o Departamento de Lingua provincial aceptou a proposta de Xoga para iniciar traballos de recompilación e investigación sobre o estado da Lingua de Signos Galega, "que está aí e segue a usarse aínda que non o pareza". Segundo dixo a nacionalista, "non puidemos poñernos de perfil e tendemos a nosa man", financiando este ano a iniciativa con 30.000 euros e co compromiso de manter o apoio como mínimo no que resta de mandato.

A deputada lembrou, porén, que "o que nós facemos é dar un pasiño na provincia de Pontevedra, pero ben é certo que esta é unha obriga de Política Lingüística do Goberno do país", polo que instou á Xunta a recoller a luva e a que o recoñecemento da LSG forme parte dos obxectivos e intereses da súa política lingüística.  

A presidenta de Xoga, María Jesús Monterde, destacou pola súa parte que para o colectivo con diversidade sensorial a oficialización da LSG é un paso "moi importante". Destacou que as linguas de signos son patrimonio que enriquece a cultura e permite ás persoas con diversidade sensorial (xordas, xordocegas e con perda auditiva) poder comunicarse, ademais de manifestar o compromiso da organización Xoga para lograr "o que por dereito lle corresponde ao pobo galego que é unha lingua de signos de seu".

Coa oficialización da Lingua de Signos Galega cumpriranse dous obxectivos primordiais, segundo Monterde: O primeiro será recuperar a identidade propia galega da comunidade xorda e con diversidade sensorial do país, xa que a lingua permite manter costumes e tradicións, así como por outra banda suplir a carencia na formación que hai na lingua oral galega para esas persoas.

A día de hoxe na Galiza, segundo apuntou Monterde, as persoas sempre son interpretadas en Lingua de Signos Española aínda que falen en galego. Tamén sinalou que "queremos que unha vez que unha persoa xorda use a LSG, esta permita tamén aprender de forma correcta a lingua oral galega, porque é un sobreaopoio moi importante", cuestión que terá aplicación práctica na mellora do desenvolvemento das persoas con diversidade sensorial nos trámites burocráticos e administrativos e na educación obrigatoria en galego.

"Buscamos recuperar algo que é noso. Estamos afalar dunha Lingua de Signos Galega e cantos máis apoios recibamos mellor, porque compete a todos. Calquera lingua, oral ou de signos, é un patrimonio cultural. Unha lingua é de todos e entre todos temos que conservala", resaltou.

Monterde explicou que os traballos da investigación financiados pola Deputación de Pontevedra comezaron en xaneiro a cargo dunha equipa formada por unha persoa coordinadora, filólogas, investigadores e intérpretes, "para dar os primeiros pasos e analizar o que está feito, o que queda por facer e con quen se pode contar e con quen habería que contar". A intención é que a finais de 2021 estea listo o primeiro informe prospectivo.

As persoas potencialmente beneficiarias da LSG serán máis de 54.000 en toda Galiza –segundo datos de Política Social–, ás que habería que sumar as que non teñen o certificado de discapacidade.