A Deputación financia catro novas actuacións na comarca de Vigo co Plan Concellos 2019
Cun total de case 132.000 euros levaranse a cabo obras nos municipios de Gondomar, Mos, Redondela e O Porriño
![Plan Concellos](/documents/1076146/8344396/plan-concellos-19-900x600.jpg/47352b06-0045-42b0-a8d8-5de45d0e1e59,qt=1547560122026,qt=1547560122026.pagespeed.ce.fxjJT6Tg3S.jpg)
A Deputación de Pontevedra aprobou, mediante resolucións presidenciais, catro novos investimentos para os concellos de Gondomar, Mos, Redondela e O Porriño, ao abeiro da liña 1 do Plan Concellos 2019, por un total de 131.952,15 euros.
Máis polo miúdo, destinaranse 47.578,93 euros para obras de mellora da pavimentación e saneamento en camiños municipais, no barrio da Fonte, en Peitieiros-Gondomar. Un total de 48.333,45 euros serán para un proxecto de edificación deportiva, destinada a ximnasio, no campo de fútbol de Coto Torrón, en Mos. Para o concello de Redondela achegaranse 24.349,77 euros que servirán para o acondicionamento e mellora do camiño do Tanque, en Cesantes. Pola súa banda, o concello do Porriño vai recibir un total de 11.690 euros para o subministro de maquinaria de viais e obras.