Conferencia maxistral Jan Gehl
Xoves 16 de decembro de 2021, das 10 ás 13 h
Salón de actos. Pazo da Cultura. Pontevedra
COMUNICADO DA DEPUTACIÓN DE PONTEVEDRA
Ante a situación de incremento da incidencia por coronavirus na provincia e con motivo da celebración da conferencia de Jan Gehl
A incidencia por coronavirus na provincia está situada en risco extremo mentres que en Dinamarca alcanza unha taxa a 14 días de 1.211 por 100.000 habitantes.
O número de persoas apuntadas para asistir no Acto de Peche da Facultade Ágora supera amplamente as 300 -incrementándose o ritmo de inscrición conforme se achega o día de celebración-, estando previstos desprazamentos a Pontevedra dende Portugal (Universidade de Porto), doutras partes do Estado español e, en maior medida, de diferentes partes da xeografía galega.
O Ministerio de Sanidade recomenda non celebrar actos masivos a pesares de permitir oficialmente o 100% da capacidade nos locais de eventos.
Por todo isto, por responsabilidade e seguindo o principio de prudencia, acórdase:
- En xeral, cancelar todos os actos de tipo masivo previstos pola institución provincial, especialmente os celebrados en interiores.
- Anular a conferencia maxistral de Jan Gehl.
- Manter a celebración da clausura da Facultade Ágora en condicións de seguridade, limitando o evento ao alumnado e, en todo caso, a un máximo do 50% da capacidade do salón de actos do Pazo da Cultura de Pontevedra.
- Dado o interese xerado, reprogramar a visita a Pontevedra e conferencia maxistral de Jan Gehl coas mesmas características coas que estaban previstas inicialmente, de maneira presencial, cando as condicións de seguridade sexan óptimas tanto para a persoa relatora como para as asistentes.
A Deputación lamenta as consecuencias da decisión, dada por motivos alleos á súa vontade, pero necesaria para controlar posibles riscos.
Cabe a posibilidade de asistir de maneira telemática á clausura da Facultade Ágora, acto no que se exporán as conclusións técnicas dos seminarios de formación realizados dende o mes de abril.
Neste evento estará presente o director xeral de Axenda Urbana e Arquitectura do Ministerio de Transportes, Mobilidade e Axenda Urbana Iñaqui Carnicero; así como o alcalde de Pontevedra e presidente da Rede de Cidades que Camiñan Miguel Anxo Fernández Lores; xunto con representantes do goberno provincial.
As persoas interesadas deben escribir a agora@depo.gal e recibirán un enlace de ZOOM.