É un fillo da memorable oliveira da colexiata de Santa María, pé multisecular de porte asombroso que desapareceu a principios do século XIX. A árbore foi cortada con motivo da construción da nova igrexa e a ela se debe o feito de chamarlle a Vigo Cidade Olívica e ás viguesas e vigueses fillos da oliva. Un vigués ilustre, Cayetano Parada y Pérez de Limia, separou unha póla da árbore proxenitora e plantouna na súa horta familiar. Conseguiu un fillo lexítimo que, por desexo expreso dos seus descendentes, pasou posteriormente ao lugar que ocupa.
Entorno
O paseo de Alfonso XII está en pleno núcleo urbano. É unha vía de gran tránsito rodado e peonil, aspectos que potencian a celebridade do histórico individuo, aínda que preocupan a contaminación ambiental e o pavimento lousado. A oliveira está rodeada por un enreixado metálico de ornato e protección, adornada con catro escudos da cidade e unha placa conmemorativa.